Официјалната страница на претседателската кампања на Доналд Трамп на кратко беше хакирана на една недела до изборите во САД на 3 ноември. На страницата donaldtrump.com неколку минути стоеше порака дека „локацијата е запленета“.

– Светот е заситен со лажни информации што претседателот секојдневно ги шири, пишуваше на сајтот.

Авторите на пораката тврдеа дека имаат доверливи информации за Трамп и неговата влада, како и дека бараат плаќање во криптовалути за да ја откријат нивната содржина, но таквите тврдења не ги поткрепија со докази.

Портпаролот на кампањата „Трамп 2020“, Тим Мурто потврди дека страницата била хакирана, додавајќи дека соработува со полицијата за лоцирање на изворот на нападот.