Владата на Соединетите Американски Држави е подготвена да дозволи забраната за социјалната мрежа „Тикток“ да стапи на сила ако не се постигне договор за продажба на кинеската компанија „Бајтденс“, изјави денес за новинарите американски функционер запознаен со содржината на американско-кинеските преговори одржани во Мадрид.

Функционерот рече дека многу од техничките аспекти на продажбата веќе се разработени, но дека кинеските претставници го поврзуваат договорот со неповрзани барања поврзани со американските тарифи и ограничувањата за технологија, објави Ројтерс.

Како што објави агенцијата вчера, најважниот исход од разговорите би можел да биде уште едно продолжување на рокот за кинескиот сопственик на TikTok да ги продаде своите американски операции до 17 септември, или да се соочи со евентуално затворање на апликацијата во САД.

Извор запознаен со разговорите рече дека не се очекува договор, но дека рокот ќе биде продолжен по четврти пат откако Доналд Трамп повторно стана претседател на САД.