Федералното биро за истраги (ФБИ) врати во Мексико историски ракопис стар речиси пет века, потпишан од шпанскиот конквистадор Ернан Кортес, објавија официјални лица, пренесува „Би-би-си“.

Документот, во кој детално се опишани логистиките на патувањето на Кортес до територијата што подоцна станала Нова Шпанија, е препознаен како оригинален ракопис потпишан од Кортес, објави „Ројтерс“.

„Ова е автентична страница од ракопис кој всушност бил потпишан од Ернан Кортес. Ваквите вредни документи се сметаат за заштитено културно наследство и претставуваат драгоцени моменти во мексиканската историја“, изјави специјалната агентка на ФБИ, Џесика Дитмер, од Одделот за уметнички криминал во Њујорк.

Кортес стигнал во Мексико со мала војска во 1519 година, кога формирал сојузи со локални групи кои се спротивставувале на Ацтечката империја, што му помогнало да го освои главниот град на Ацтеките, Теночтитлан – денешен Мексико Сити – само две години подоцна.

Документот датира од 20 февруари 1527 година, само неколку дена пред еден од главните поручници на Кортес да биде назначен за ко-гувернер на освоената територија. Тоа била клучна година за формирање на кралски и религиозни институции кои ќе владеат со домородните народи на Мексико сè до неговата војна за независност во 1810 година.