Украинскиот претседател Володимир Зеленски доби дипломатска поддршка од Европа и НАТО пред самитот Русија-САД оваа недела, каде што Киев стравува дека претседателот Владимир Путин и претседателот Доналд Трамп би можеле да се обидат да диктираат услови за завршување на три и полгодишната војна.

Трамп, кој со недели се закануваше со нови санкции против Русија поради нејзиниот неуспех да ја заврши војната, наместо тоа во петокот објави дека ќе се сретне со Путин на 15 август во Алјаска.

Официјален претставник на Белата куќа изјави дека Трамп е отворен за доаѓање на Зеленски, но дека подготовките се во тек само за билатерална средба.

Трамп рече дека потенцијалниот договор би вклучувал „одредени размени на територија во корист на двете (страни)“, зголемувајќи ги стравувањата на Украина дека би можела да се соочи со притисок да ја предаде земјата. Зеленски вели дека сите одлуки донесени без Украина ќе бидат „мртвородени“ и нефункционални.

Во саботата, лидерите на Велика Британија, Франција, Германија, Италија, Полска, Финска и Европската комисија изјавија дека секое дипломатско решение мора да ги заштити безбедносните интереси на Украина и Европа. „САД имаат моќ да ја принудат Русија на сериозни преговори“, изјави во неделата шефицата за надворешна политика на ЕУ, Каја Калас. „Секој договор меѓу САД и Русија мора да ги вклучи Украина и ЕУ, бидејќи станува збор за безбедност на Украина и цела Европа“.

Министрите за надворешни работи на ЕУ ќе се состанат во понеделник за да разговараат за следните чекори, рече таа. Генералниот секретар на НАТО, Марк Руте, за американската мрежа ABC News изјави дека средбата меѓу американскиот претседател Доналд Трамп и рускиот претседател Владимир Путин ќе покаже дали Путин е сериозен во врска со мирот.

„Следниот петок ќе биде важен бидејќи ќе биде тест колку е сериозен Путин во врска со завршувањето на оваа ужасна војна“ изјави Руте за ABC.

Руте изјави дека верува оти Трамп е подготвен да го „притисне“ рускиот претседател по прашањето на оваа брутална војна.

Тој рече дека договорот не може да вклучува правно признавање на руската контрола врз украинската територија, иако може да вклучува и де факто признавање. Тој го спореди тоа со ситуацијата по Втората светска војна кога Вашингтон прифати дека балтичките држави Латвија, Литванија и Естонија се де факто под советска контрола, но не ја призна законски нивната анексија.

Зеленски во неделата изјави: „Крајот на војната мора да биде праведен и јас сум благодарен на сите што денес стојат покрај Украина и нашиот народ“. Европски функционер рече дека Европа изнесе контрапредлог на Трамповиот, но одби да даде детали. Руските функционери ја обвинија Европа дека се обидува да ги блокира напорите на Трамп да ја заврши војната.

„Евро-имбецилите се обидуваат да ги блокираат американските напори да помогнат во решавањето на украинскиот конфликт“, објави поранешниот руски претседател Дмитриј Медведев на социјалните мрежи во неделата.

Портпаролката на руското Министерство за надворешни работи, Марија Захарова, во остра изјава изјави дека односот меѓу Украина и Европската Унија наликува на „некрофилија“.