Генералниот секретар на НАТО, Марк Руте, денес изјави дека руските напади врз Киев синоќа, кои погодија цивилни области и дипломатската мисија на ЕУ во Киев и убија најмалку 18 лица, покажуваат дека рускиот претседател Владимир Путин е подготвен да ја продолжи војната.

„Сите сме шокирани од она што се случи, пред сè затоа што ова се напади кои не се врз воени цели; ова се цивилни цели. Додека се обидуваме да направиме сè за да го поддржиме американскиот претседател Доналд Трамп да ја заврши оваа војна, во меѓувреме, рускиот претседател Путин е подготвен да ја продолжи, да продолжи да напаѓа невини цивили во Украина“, рече тој на прес-конференција во германскиот град Вирцбург.

Тој истакна дека денес се консултирал со претседателката на Европската комисија, Урсула фон дер Лајен, и со високата претставничка за надворешни работи, Каја Калас, по рускиот напад врз мисијата на ЕУ во Киев, објави германската N-TV.

„Нападот уште еднаш докажува дека не смееме да бидеме наивни во врска со Русија“, предупреди Руте.

Сепак, тој рече дека Русија е способна за хибридна војна.

„Доколку сметаат дека е потребно, можат дури и да извршат атентат“, нагласи Руте.

Според него, Русија се обидува да го наруши и цивилниот воздушен сообраќај, на пример во Германија и балтичките држави.