На седницата на Советот на јавните обвинители која е закажана за понеделник, ќе се знае и официјално каде ќе работи обвинителката Вилма Русковска, откако заврши нејзиниот мандат во Обвинителството за гонење на организиран криминал и корупција. Таа се уште е суспендирана, а во изјава за порталот Либертас таа потврдува дека нејзината следна работна средина ќе биде скопското обвинителство.

-Ќе се вратам во Скопското обвинителство,од таму дојдов во организиран криминал ,така е според законот – изјави Русковска за Либертас.

На седницата в понеделник ќе се бира и шеф на Вишото обвинителство во Скопје. На огласот беа пријавени тројца кандидати – актуелниот обвинител Мустафа Хајрулахи и вишите обвинители Фатиме Фетаи и Бурим Рустеми, но Фетаи вчера, неочекувано ја повлече својата кандидатура.