Суспендираната шефица на Обвинителството за гонење на организиран криминал и корупција Вилма Русковска на која следниот месец и истекува мандатот, денеска изјави дека веќе поднела кандидатура за втор мандат. Таа поведувањето на дисциплинска постапка, како и поднесената кривична пријава не го гледа како притисок кон неа и кон сите јавни обвинители. Таа ова го објави денеска по давањето исказ во Обвинителството за кривичната пријава која против неа ја поднесе поранешниот директор на Управата за Финансиска полиција Арафат Муареми.

„Очекувам колегите да ме подржат во кандидатурата и да гласат за мене“ изјави кусо таа.

Рускоска на пресот пред ОЈО кажа дека очекува да се отфрли предметот кон неа поднесен од страна на Муареми.

„Апсолутно очекувам да се отфрли пријавата, не направив увид во доказите, ја видов кривичната пријава, ми беше понуден да го видам записникот, не бев заинтересирана да ја прочитам изјавата на Муареми“, изјави таа.

Инаку републичкиот јавен обвинител во август ја суспендираше Русковска додека трае кривичната постапка поведена против неа по иницијатива на поранешниот директорот на Управата за финансиска полиција Арафат Муареми за како што тврди тој, нелегалниот претрес во Управата.