Полицијата во Санкт Петерсбург уапсни познати руски историчар под сомниение дека извршил убиство, откако беше пронајден во река со ранец во кој имало човечки раце, објави Би-Би-Си.

Олег Соколов бил под дејство на алкохол и паднал во река, откако се обидувал да се ослободи од човечки делови, пренесоа локалните медиуми. Полицијата наводно потоа направила претрес во неговиот дом, каде нашле обезглавено тело на негова 24-годишна поранешна ученичка.

Професорот Соколов е експерт по историја за францускиот војсководец Наполеон, а неговата жртва се верува дека е Анастасиа Јешченко, со која заеднички имаат напишано неколку дела.

Полицијата рече дека 63-годишниот маж бил спасен од реката Моика и уапсен под сомниение за убиство. Официјални лица за „АФП“ потврдија дека станува збор за професорот Соколов.

Историчарот има напишано неколку книги за Наполеон, а бил и советник за неговиот лик и дело на неколку филмови. Соколов исто така е член на францускиот Институт за социјални науки, економија и политика (ИССЕП), кој во саботата кажа дека го отстраниле од неговата позиција на научниот комитет.