Русија има програма на шпионирање во морињата на северна Европа, а десетици воени и цивилни бродови ги означуваат местата на кои се можни саботажи, се тврди во документарен филм, дел од кој беше објавен денеска на водечките нордиски телевизии.

Овие тврдења веднаш ги отфрли официјална Москва, наведувајќи дека тие се неосновани. Кремљ уште еднаш повика на транспарентна и непристрасна меѓународна истрага за саботажата на гасоводот „Северен поток“ во Балтичкото Море во септември лани.

Според заедничката истрага на норвешката телевизија „НРК“ од Норвешка, данската „ДР“ шведската „СВТ“ и „Иле“ од Финска, кои се повикуваат на извори од разузнавачките служби на нордиските земји, Москва за шпионирањето го користи бродот „Адмирал Владимирски“, кој официјално е научно пловило, пренесува „Би-би-си“.

На крајот на минатата година, овој брод пловел блиску до големите паркови со ветерници во морето кај Данска и Британија, што може да значи дека ја бележел енергетската инфраструктура.

Кога тим на телевизијата „ДР“ му се доближил на бродот „Адмирал Владимирски“, од него излегле двајца вооружени војници со маски и им дале знак дека се забележани, покажуваа снимки кои се дел од документарецот кој го објави данската телевизија.

Руската разузнавачка служба редовно користи и рибарски и товарни бродови, дури и јахти, опремени со средства за подводен или радионадзор, се тврди во истрагата на нордиските медиуми.

Документарецот насловен „Војна на сенките“ наведува случај кога норвешката полиција открила стари советски радиостаници, со оператор, на руски рибарски бродови. Како што се тврди, 27 такви сомнителни бродови пловеле во шведските води или влегле во шведските пристаништа во текот на последните пет години.

Во Норвешка во текот на десет години, според пресметката врз основа на „електронскиот потпис“ на бродовите АИС (Автоматски идентификациски систем), најмалку 50 руски бродови имале можност тајно да собираат информации, наведува телевизијата „НРК“.

Документарецот кој во целост треба да биде емитуван вечерва, веднаш предизвика реакција на Москва, која укажа на одговорноста на Западот за саботажата на руските подморски гасоводи „Северен поток“, кои пренесуваат руски гас до Германија и оттаму во цела западна и северна Европа.

„Медиумите на тие земји направиле грешка во својата истрага. Повеќе сакаат повторно неосновано да ја обвинуваат Русија“, изјави портпаролот на Кремљ, Дмитриј Песков.

„Ние повеќе би сакале да посветат поголемо внимание на нападите на „Северен поток“ и на транспарентна и непристрасна меѓународна истрага на тие акти на саботажа“, додаде тој.