Руските власти денеска оценија дека одлуката на САД да испорача касетни бомби во Украина е гест на „признавање на слабостите“, додавајќи дека тоа ќе го направи Вашингтон „соучесник“ во убивањето цивили со тоа контроверзно оружје.

„Пренесувањето на касетна муниција е гест на очај и признавање на слабостите во контекст на неуспехот на таканаречената украинска контраофанзива“, се вели во соопштението на руското Министерство за одбрана.

Руската дипломатија го осуди „циничниот обид да се продолжи агонијата на актуелните украински власти кои не се грижат за цивилните жртви“, бидејќи овие касетни бомби убиваат неселективно.

„Со набавка на касетна муниција, Вашингтон всушност ќе биде соучесник и ќе биде одговорен за смртта на руски и украински деца“, додаваат руските власти.

Тоа оружје е забрането во многу земји, особено во Европа, потписнички на Конвенцијата од Осло од 2008 година. Во таа конвенција не се вклучени ниту САД, ниту Украина, ниту Русија.

Американскиот претседател Џозеф Бајден изјави дека одлуката за испорака на касетна муниција во Украина е „многу тешка“, но дека е „исправна“.

Украинскиот министер за одбрана Олексеј Резников ја поздрави одлуката на САД да испратат касетна муниција во земјата.

Добиј ги најважните вести, бесплатно на Viber
Во објава на Твитер, Резников рече: „Новото оружје значително ќе ни помогне да ги деокупираме нашите територии, истовремено спасувајќи ги животите на украинските војници“.

Тој рече дека муницијата „нема да се користи на официјално признатата територија на Русија“.

Од касетните бомби кои убиваат и по неколку години НАТО не се откажува, велат дека тие се за одбрана на Украина