Данска треба да се фокусира на фактот дека Гренланѓаните не сакаат да бидат дел од оваа земја, изјави американскиот државен секретар Марко Рубио денеска во Брисел.

– Гренланѓаните ќе донесат одлука, им рече Рубио на новинарите на прес-конференција по состанокот со другите министри за надворешни работи на НАТО.

Рубио денеска со шефот на данската дипломатија Ларс Локе Расмусен ги потврди „силните односи“ меѓу двете земји, кои во реалноста се екстремно затегнати по доаѓањето на Трамп на власт во САД и неговите претензии на островот, кој за Америка има големо стратешко и безбедносно значење.

Идниот премиер на Гренланд, Јенс-Фредерик Нилсен, денеска за данската телевизија ТВ2 изјави дека Рубио греши.

– Не е во право дека Гренланд сака утре да прогласи независност. Тој е во право дека Гренланд не сака да биде дански, но Гренланд сигурно не сака да биде американски, рече тој.

„Секојдневно работиме да создадеме основа за да можеме еден ден да бидеме независни, но се уште не сме таму. Тоа што го кажува Рубио не држи вода“, додаде Нилсен.