Ѕвездата на португалската фудбалска репрезентација и Јувентус, Кристијано Роналдо се врати во Италија, иако е позитивен на коронавирус и ќе остане во карантин таму до крајот.

– Кристијано Роналдо се врати во Италија со посебен медицински лет одобрен од медицинските власти на негово барање и ќе ја продолжи својата задолжителна самоизолација дома во Торино – објави италијанскиот клуб.

Португалскиот дневен весник „А Бола“ објави дека 35-годишниот фудбалер го напуштил Лисабон со приватен авион, а италијанските медиуми објавија дека на аеродромот во Торино го чека брза помош, која ќе го однесе до неговата резиденција.

Јувентус исто така објави дека во средата е регистриран нов случај на коронавирус во неговите редови, а позитивен е и американскиот играч за врска Вестон Мекени.

Португалскиот селектор Фернандо Сантош изјави дека не може да објасни како Кристијано Роналдо доби позитивен тест.

– Од минатиот понеделник, ние сме во целосен карантин, во еден вид меур. Во него се само стручниот штаб и играчите, никој друг, а сите други тестови беа негативни неколку пати – рече Сантош.

Кристијано Роналдо позитивен на коронавирус

Роналдо е во карантин со соиграчите од Јувентус од 3 октомври, па италијанските власти го доведоа во прашање неговиот негативен тест за коронавирус пред тој да се приклучи на националниот тим.

Бидејќи Роналдо беше позитивен во вторникот, тој го пропушти синоќешниот натпревар во Лигата на нации против Шведска. Тој играше против Франција два дена порано и против Шпанија минатата среда. Сите негови соиграчи беа негативни.

Напаѓачот на Јувентус исто така ќе мора да го пропушти натпреварот од Лигата на шампионите поради задолжителна самоизолација на 20 октомври против Динамо Киев.