Бразилската фудбалска легенда, Роналдо Назарио вели дека фудбалерот на Интер Мајами Лионел Меси треба да ја освои наградата „Златната топка“ пред Ерлинг Халанд од Манчестер сити.

Меси, Халанд и Килијан Мбапе од ПСЖ се меѓу фаворитите за освојување на „Златната топка“ оваа година.

Победникот на „Златната топка“ за 2023 година ќе биде објавен следната недела.

Роналдо верува дека Меси треба да ја освои наградата без никаков сомнеж откако ја предводеше репрезентацијата на Аргентина да го освои Светското првенство во ФИФА во Катар 2022.

– Златната топка треба да му припадне на Лионел Меси, без сомнение. Она што го направи Меси на Светското првенство беше посебно. Ме потсети на настапите на Пеле и Марадона – рече Роналдо, а пренесува „ТНТ Спортс“.

Меси има најмногу „Златни топки“, вкупно седум, последната ја освои во 2021 година, втор на оваа вечна листа е Кристијано Роналдо (пет), а лани „Златната топка“ заврши во рацете на Карим Бензема.