Легендарниот бразилски фудбалер, Роналдињо, е пуштен на слобода откако вчера беше уапсен поради влез во Парагвај со фалсификувани документи. Покрај Роналдињо бил уапсен и неговиот брат, Роберто Асис.

Според парагвајските закони, најтешка казна за поседувањето на лажни документи е пет години затвор.
Роналдињо во средата пристигна во Парагвај за да ја промовира својата книга „Гениј во животот“, но исто така и да биде дел од хуманитарен настан.

Ова не е прв пат Роналдињо да биде уапсен поради сличен прекршок. Во 2018 година, бразилските власти му го запленија пасошот се додека не ја плати казната која ја доби поради изградба на платформа за риболов без дозвола на локалното Министерство за заштита на животната средина.

Интересно е што Роналдињо минатата година од страна на бразилскиот претседател Жаир Болсонаро е именуван за амбасадор на туризмот иако не смееше да ја напушти државата.