Романската агенција за меѓународна соработка и развој „РоАид“ ќе донира специјализирано возило за Дирекцијата за заштита и спасување (ДЗС), наменето за зајакнување на капацитетите во справување со шумски пожари.

Договорот за донација вчера во Романија го потпиша директорот на ДЗС, Стојанче Ангелов, со државниот секретар во романското Министерство за внатрешни работи, Рајед Арафат, кој раководи со Одделот за вонредни состојби.

Ангелов истакна дека оваа донација претставува значаен придонес за унапредување на оперативната подготвеност на ДЗС и потврда за континуираната поддршка од страна на „РоАид“.

Од 2021 година досега, оваа романска агенција на ДЗС веќе има донирано теренско возило (ATV) и радио комуникациска опрема.