Владеењето на правото, како клучна компонента за сè и јавната администрација се области во кои земјата најмногу доцни во исполнување на реформите. Потребна ни е компетентна јавна администрација која ќе ги спроведе сите реформи. Владеењето на правото стагнираше во изминативе неколку години и затоа треба да имаме конкретни чекори, вели евроамбасадорот Михалис Рокас.

На денешната прес-конференција на Рокас и министерот за европски прашања Орхан Муртезани, на која беа презентирани мерките од Планот за раст за Западен Балкан и Реформската агенда 2024-2027, евроамбасадорот, одговарајќи на новинарско прашање, кажа дека ставот на Европската Унија е дека сè што може да се гледа како мешање во независноста на судството за нив предизвикува загриженост.

– Сакаме преку реформи, кои сите ги чекаме, да видиме силно судство – порача Рокас.

Според него, не се работи за поединци, туку за процесот. ЕУ, или она што тие го препорачуваат, е силен систем што ќе ја почитува независноста на судство.

Во однос на Реформската агенда, евроамбасадорот вели дека претпристапната помош всушност е двигател со којшто се постигнува проширувањето.

– Да бидам јасен околу една работа – парите коишто ги даваме денеска се всушност дополнување на она што веќе постои. Реформската агенда и распределбата за Република Северна Македонија е 750,4 милиони евра, покрај тековните ИПА програми што надминуваат 500 милиони евра во чисти грантови за финансирање. Со овие финансиски распределби и јасната политичка поддршка, реформската агенда од Планот за раст е досега невидена можност за земјата да ги забрза клучните придобивки од членството на ЕУ – изјави тој.

Спроведувањето на Реформската агенда од Планот за раст, нагласи Рокас, треба да резултира со тројна победа – опипливи придобивки за граѓаните, забрзување на интеграцијата на земјата во ЕУ и дополнителни ресурси во буџетот на земјата за поддршка на потребните реформи. Резултатите ќе се оценуваат два пати годишно, а средствата ќе се ослободуваат соодветно на фиксните полугодишни распореди само ако се постигнат целите, ќе се вршат и плаќањата кон националните буџети.

Министерот за европски прашања Орхан Муртезани укажа на важноста на Планот за комуникација и видливост на Планот за раст која, како што рече, е клучот на успешноста на реформите.

– Добро осмислената и спроведена комуникација не е само формален чекор или административна задача. Напротив комуникацијата е клучот на успешноста на реформите. Јасноста, транспарентноста и разбирливоста се услов граѓаните да почувствуваат дека реформите се нивни и дека евроинтеграција не е далечен и апстрактен концепт, туку конкретна и опиплива можност за подобар живот – рече меѓу другото Муртезани.

Планот за комуникација и видливост е создаден во тесна комуникација со Делегацијата на ЕУ, претставува стратешки документ и зацртана насока и јасна определеност за отвореност и транспарентност кон сите граѓани и нивно вклучување во спроведувањето на реформите.