Месечно отчитување на броилата, како и нивна вонредна проверка по случаен избор кај дел од потрошувачите што имаат доставено приговори до Регулаторната комисија за енергетика (РКЕ), се дел од мерките на кои Комисијата работи веќе подолго време. Овој сет на мерки ќе стапи во сила по завршување на сеопфатната експертска консултативна фаза, по што јавноста ќе биде детално запознаена со нивниот конечен изглед, велат од РКЕ за „Слободен печат“.

Оттаму додаваат дека овие механизми се со цел да ја зајакнат довербата и да се надминат дилемите кај потрошувачите што се сомневаат во исправноста на броилата. Во работата е вклучено и Министерството за енергетика. Лавина реакции имаше во јануари февруари по добивањето на првите поскапени сметки за струја, а некои од граѓаните реагираа дека требало да платат повеќе и до 30 отсто. Според пресметките на Здружението на инжинери врз основа на Пописот, во земјава има околу 600 илјади домаќинства, а ЕВН има 915.492 броила.
Според законот, ЕВН Хоум е должно квартално, на секои три месеци, да ги отчитува броилата за да се осигури дека податоците се точни.

– Од ЕВН хоум информираат дека околу 85 отсто од броилата се отчитуваат секој месец. Меѓутоа има броила што се поставени во имотот на корисниците и кои не можат да се отчитаат доколку корисникот не е присутен. Вкупно 15 отсто од броилата, во кои влегуваат непристапни, во одделни рурални средини, се читаат двапати годишно – посочија од Министерството за енергетика.

Инаку, до 21 март годинава, во РКЕ пристигнале повеќе од 500 приговори за високи сметки за електрична енергија, од кои половина се веќе разгледани (282) и нив е постапено. Од разгледаните, околу 30 отсто се разрешени и фактурите се коригирани, информираат од РКЕ.

– Се работи за 87 потрошувачи, од кои на 70 им е испратена коригирана фактура од страна на ОДС (за што РКЕ доби информација дека ЕВН хоум веќе  изготвил коригирани фактури со реална состојба, по отчитување на броилото), а за 17 приговори РКЕ на главна седница донесе позитивни решенија. Кај останатите е констатирано дека во сметката е прикажана реалната потрошувачка и тие приговори се одбиени – прецизираат од РКЕ за нашиот весник.

Оттаму додаваат дека Комисијата работи во континуитет и за веќе пристигнатите поплаки, но и за оние кои ќе пристигнат – ќе постапува во согласност со утврдената состојба. РКЕ контролира дали Електродистрибуција ги има отчитано броилата и дали реалната потрошувачка соодветствува со фактурираната од страна на Универзалниот снабдувач ЕВН хоум.
Според правилата, потрошувачите најпрво треба да поднесат приговор до ЕВН хоум, а доколку не добијат задоволителен одговор, можат да се обратат до РКЕ, како второстепен орган.

За да се разгледа нивниот случај, потребно е да достават копија од приговорот до ЕВН, одговорот што го добиле и спорната сметка. Доколку и решението на РКЕ не е прифатливо, незадоволните граѓани можат да покренат управен спор.

Од Организацијата на потрошувачите изминатиот период информираа дека поплаките за сметките за струја најчесто се однесувале на фактот дека во нив бил опфатен поголем пресметковен период. Тие изброиле дека наместо 30, им се пресметувале 40 дена и автоматски со тоа им се зголемуваат сметките за струја, бидејќи влегле во повисока тарифа. ОПМ ги упатувала до Регулаторната комисија за енергетика да поднесат приговор.
Од јануари годинава, струјата во земјава поскапи во просек за 0,92 отсто за домаќинствата во првите три потрошувачки блокови. За најголемите потрошувачи (четвртиот блок), поскапувањето достигна 2,24 отсто.