Ракометниот клуб на Бутел Скопје го освои трофејот на меморијалниот турнир „Горан Ченгиќ“ во Сараево, Босна и Херцеговина откако во драматично финале го совлада составот на Вогошча со 38:37, по ударите од седум метри.

Во регуларниот дел натпреварот заврши 30:30, иако Бутел Скопје можеше многу порано да го реши прашањето околу победникот. Водеше на паузата со 16:14, како и со шест гола во вториот дел, но упорната босанска екипа успеа до крајот да стигне до реми.

По првите пет пенали беше повторно нерешено, 33:33, па мораше нова серија удари од седум метри. Таму издоминираа голманите на Бутел Скопје, Бојан Блажески кој одбрани два пенали, како и Александар Стојаноски, кој го запре последниот удар на Фахрудин Мелиќ по што следуваше радоста на македонскиот претставник.

Филип Николов постигна дури 16 гола на овој натпревар, додека по пет пати во листата на стрелците се запишаа Дамјан Субашевски и Димитар Ѓеоргиевски.

Претходно во групната фаза, Бутел Скопје убедливо славеше против Босна Сараево, Рудар Плевља и Марибор.