Капитенот на фудбалската репрезентација на Македонија и член на Динамо Загреб, за хрватски „Јутарњи лист“ зборуваше за проблемите со кои се соочува македонскиот фудбал. Ристовски вели дека не знаеме да ги цениме и чуваме брендовите како што е Вардар.

– Македонскиот фудбал не е сјаен, што се вели колку пари-толку музика. Фудбалот денеска е голем бизнис, а во Македонија стагнира инфраструктурата. Се надевам дека ќе дојдат и кај нас нашите пет минути. Ете, Вардар пред неколку години играше групи во Лига Европа, а сега е во втора лига и многу ми е жал за тоа. Не знаеме да ја чуваме традицијата, не знаеме да чуваме бренд. Многу клубови, кошаркарски, ракометни, фудбалски пропаѓаат. Мора да си одите од Македонија за да станете фудбалер и во овој момент не гледам во кој клуб може подолго да останете. Динамо е пример како треба да се работи – вели Ристовски.

Ристовски и Динамо Загреб во второто квалификациско коло во Лигата на шампионите може да се сретне токму со македонскиот шампион Шкупи кој во првото коло се среќава со првакот на Гибралтар Линколн.

– Шкупи е шампион и треба да се има респект кон секој првак, не знам многу за нив зашто тимот е доста променет, но има доста навивачи и би било тоа добар меч ако Шкупи помине во следната рунда. Би била вистинска атмосфера во Скопје – рече Ристовски.