Фудбалерите на стадионите ќе доаѓаат во неколку автобуси, играчите на клупата ќе носат маски, а головите ќе се слават со допирање на лактите, така ќе изгледа германскиот фудбал кога Бундеслигата ќе се врати претстојниот викенд после двомесечната пауза поради пандемијата на коронавирус.

Германската фудбалска лига до надлежните им го претстави документот со упатствата на 51 страница за да добие право Бундеслигата да ја продолжи натпреварувачката сезона.

Ќе се применуваат вонредните мерки за заштита на играчите и други учесници од коронавирусот.

Централниот столб на овој план е масовното тестирање на фудбалерите, тренерите и останатите во клубот. Ќе бидат тестирани најмалку двапати неделно и еднаш пред натпреварот. Лицето позитивно на вирусот ќе биде одвоено од остатокот на тимот.

Само околу 300 луѓе ќе можат да бидат на стадионот на денот на натпреварот. Тие ќе бидат поделени во три зони за да се избегне каков било чекор помеѓу групите.

На теренот ќе бидат само играчите, судиите, лицата за брза помош и мала група на фотографи. Ќе има мала група новинари и сниматели на празните трибини.

Надвор од стадионот, ќе има трета група, вклучувајќи го и обезбедувањето. Работата на полицијата ќе биде да ги спречи навивачите да се соберат околу стадионот.

Екипите ќе доаѓаат во неколку возила за да го обезбедат потребното растојание од метар и пол. Секој во возилата ќе мора да носи заштитни маски.

Правилата за социјално растојание ќе треба да се почитуваат во соблекувалните. Кога играчите излегуваат на терен, нема да се дозволат ракувања и нема да има групни фотографии.

Играчите и судиите на теренот не мора да носат маски, но тоа правило ќе мора да го почитуваат останатите, вклучувајќи ги и играчите на клупата. Топките ќе бидат дезинфицирани редовно во текот на мечот.

На фудбалерите им било кажано дека физичкиот контакт треба да биде само како резултат на играта во текот на натпреварот, а славењето на голови е забрането – освен контакт со лактите и нозете.

На осум страници од документот се опишуваат и мерките на кои мора да се придржуваат ТВ-екипите, вклучително и поставувањето на пластични прегради меѓу новинарот и лицето од кое е земена изјавата.

Само десет новинари ќе можат да присуствуваат на натпреварите. Нема да има пресконференции или микс зони.

Екипите кои гостуваат мора да резервираат цели хотели или, најмалку, цел кат. Хотелот мора да се дезинфицира пред да пристигне играчот.

Дома, играчите треба да живеат во речиси карантински услови. Истите правила важат за сите членови на семејството на играчот.