Настанот „Синема мејд ин Итали“ (Cinema made in Italy), кој во нашава земја се одржува за првпат, е организиран од „Синечита“ (Cinecittà), Италијанскиот институт за култура од Белград, Амбасадата на Италија во Скопје и „Синеплекс“ во „Скопје Сити мол“. Ревијата на современ италијански филм „Синема мејд ин Итали“ ќе се одржи од 6 до 9 ноември во киното „Синеплекс“ во Скопје.

Програмата вклучува четири филма од најновата италијанска продукција, кои беа прикажани на последното издание на Филмскиот фестивал во Венеција: „Убаво лето“ (2023) во режија на Лаура Лукети; „Како овци меѓу волците“ (2023) во режија на Лида Патитучи; „Мими – принцот на ноќта“ (2023) во режија на Брандо Де Сика; и „Адаџо“ (2023) во режија на Стефано Солима.

Филмовите се титлувани на македонски јазик, а проекциите почнуваат во 20 часот. Сите приходи од продажбата на билетите со симболична цена од 120 денари, како и од донациите на посетителите, ќе бидат наменети на Здружението за поддршка на лица со посебни потреби „Дајте ни крилја“ од Скопје, известија од Амбасадата на Италија во Скопје.

Филмската ревија е дел од богатата програма на настани организирани од Амбасадата на Италија во Скопје, по повод одбележувањето на 30-годишнината од воспоставувањето на дипломатските односи помеѓу Италија и Република Северна Македонија.