Жиро-сметката на регионалното Јавно претпријатие „Русино-Полог“ кое управува со регионалната депонија Русино, каде сите полошки општини го депонираат сметот е блокирана, со што се доведува во прашање тековното одржување на депонијата Русино.

Директорот на претпријатието Бесим Догани, вели дека кубурат со финансии оти општините од полошко не ги плаќаат своите обврски кон ЈП „Русино Полог“ кое пак не може да ја плати фирмата-оператор која ја одржува депонијата, за на крај да останат и со блокирана сметка.

Како што вели директорот Догани, најголеми должници се Комуналните претпријатија на Гостивар, Тетово, Желино и Јегуновце, кои кон Јавното претпријатие должат над 11 милиони денари.

„Овој месец блокирана ни е сметката поради фирмата-оператор, кон која имаме голем долг од околу 4 милиони денари. Комуналните претпријатија на полошките општини многу доцнат со плаќањето на нивните обврски. Вкупниот долг надминува над 11 милиони денари. Поради недостиг на финансиски средства не бевме во можност да извршиме покривање на донесениот отпад, туку само го распределувавме по депонијата за да отвориме простор за нов. Непокриениот отпад носи опасност од појава на пожари, ширење лоша миризба, токсични гасови, прелевање на отпадни води и фактички зголемува можност за еколошки штети врз околината. Откако ни е блокирана сметката значително е полошо, не можеме да ги исплаќаме ни најобичните дневни трошоци. Позитивно е што до сега изменаџиравме да го задржиме операторот, луѓето и тековните работи да течат, депонијата работи со предвиденото работно време до 19 часот, има 24 часовен надзор со човек во ноќна смена. Но, овој простор се стеснува, нема да можеме да ги извршуваме и најобичните работи, се плашам дека ќе дојдеме до ситуација да не бидеме во можност да ги плаќаме вработените и тие да ја остават работата“, изјави Догани.

Минатата недела неколку дена жителите од полошкиот регион се гушеа во густ чад откако се запали депонијата кај Волковија, чиј концесионер беше казнет од државниот инспекторат оти истата работeлa без стандарди.

Но, оваа депонија не е единствената во полошко која не ги исполнува стандардите за претовар на комуналниот смет.

Станицата која Јавното комунално претпријатие Тетово ја користи за претовар на сметот е налик на дива депонија. Таа е оградена, но истата е лоцирана среде земјоделска обработлива површина во атарот на тетовското село Фалише, а сметот пред да се однесе во регионалната депонија Русино наместо во посебни контејнери како што налагаат стандардите се претовора односно се истура на земја загадувајќи го воздухот, почвата и подземните води.

Градоначалникот на Тетово Билал Касами, општина која исто така должи кон Јавното претпријатие „Русино Полог“ и на чија територија неколку години функционира депонија без стандарди, побара инпекторатот да врши почести контроли врз депониите, кои преставуваат голема еколошка закана.

„Има проблем во делот на државната инспекција која треба да ги контролира општините и јавните претпријатија како и депониите дали работаат согласно законот. Депонијата Русино ги исполнува сите услови, но таму треба да помогнат сите општини да ги реализираат сите обврски за да може и понатаму да се работа согласно стандардите“, рече Билал Касами градоначалник на Општина Тетово.

За состојбата во јавното претпријатие Русино Полог и можните последици се информирани сите градоначалници од полошко кои должат кон претпријатието, но досега од нив нема никаков одговор.

Македонија како големо буниште, најголемите депонии ги создаваат институциите