Компирот е најомилена намирница во македонската кујна, од кој можете да подготвите некои од највкусните јадења. Денеска ви предлагаме да направите совршена закуска (грицки), која можете да ја послужите и за вечера, а станува збор за стапчиња од пире од компири. Во комбинација со пармезан едноставно се неодоливи, а нивната подготовка воопшто не е комплицирана.

Стапчињата од компир можете да ги подготвите кога ќе ви се најават гости, но и кога сакате едноставна вечера. Уживајте!

Состојки:

– 750 г компири
– 1 јајце
– 50 г пармезан сирење
– 1 китка магдонос
– 2 лажици пченкарен скроб

Подготовка:

Исечкајте ги и сварете ги компирите, па процедете ги и направете пире. Во пирето додајте сечкан магдонос, пармезан, јајце, па посолете и побиберете. Измешајте и додајте скроб, па повторно соединете.

Земете парче од смесата и обликувајте издолжен ролат и редете во плех обложен со хартија за печење и премачкан со масло.

Секое стапче премачкајте го со масло и печете во загреана рерна на 200 степени околу 30 минути.