Лесните летни јадења кои не бараат многу подготовка се сѐ што посакуваме овие денови, а ова песто од тиквички е токму тоа. Лесно се подготвува, не бара вклучување на шпоретот или рерната и најдобро од сè – можете да го подготвите во поголеми количини и ќе биде готово за јадење директно од фрижидер.

Можете исто така да го замрзнете и да уживате во свежо песто во текот на целата година.

Без разлика дали ќе го послужите со интегрални тестенини или како сос за свеж зеленчук, ова песто од тиквички сигурно ќе ви се допадне!

Состојки:

– 200 г тиквички
– 1/2 лажичка сол
– 30 г рендан пармезан
– 30 г пекорино сирење
– 125 г маслиново масло
– 30 г пињоли
– 1 китка свеж босилек

Подготовка:

Изрендајте ги тиквичките и посолете ги, па оставете ги 30 минути да се ослободи вишокот вода.
Тиквичките исцедете ги и ставете ги во блендер, па додајте ги останатите состојки и половина од количината масло.
Измешајте ги состојките додека не се соединат, а потоа додадете го остатокот од маслото и блендирајте додека не добиете хомогена смеса.
Послужете со интегрални тестенини или со здрави грицки и зеленчук.