Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува еден интересен рецепт – солени вртени стапчиња.

„Со прекрасен мирис од путерот, како памук меки, внатре со млечен вкус од моцарелата, која се тегне како конци, а надополнет со убавиот шмек од лукот и магдоносот, повеќеслојни и декоративни се овие вртени стапчиња“, вели Бобе.

Потребни состојки за тесто:

– 400 г брашно,
– 180 мл млеко,
– 7 г сув квасец,
-30 г путер стопен,
– едно јајце,
– една мала лажичка сол.

Потребни состојки за фил:

– 250 г моцарела или ајдемер,
– лажица лук во прав,
– неколку гранчиња магдонос.

За премачкување:

– 20 г стопен путер,
– жолчка.

Подготовка:

Во длабок сад се мешаат сите состојки за тесто. Се замесува меко тесто, се формира топка се покрива со крпа и се остава еден час да стаса тестото.

Откако ќе стаса тестото, без да се премесува се дели на четири еднакви дела. Се земаат две топчиња и секое се расукува 20х30 см. Едното од нив се премачкува со путерот, се наросува со половина од моцарела (другата половина за другото тесто), врз неа се става дел од магдонос и се става малку лук во прав. Филот се покрива со другото развлечено тесто.

Со нож се сече тестото на осум ленти од потесната страна (20 см). Четири ленти се премачкуваат со путер. Земаме една лента тесто која не е намачкана со путер и ја ставаме врз лента намачкана со путер. Продолжуваме исто со останатите ленти тесто. Значи добиваме сега четири ленти. Секоја лента со стапче дрвено за раженче ја стискаме на средина по должина на лентата од тесто, за да се разлистаат слоевите. Потоа секоја лента ја сукаме (ја вртиме) и ја ставаме во тава на хартија за печење.

На крај се премачкуваат со жолчка и се ставаат да се печат 20 минути, во загреана рерна на 220 степени.