Дијана Иваноска со својот талент за комбинација на вкусови нè носи на едно исклучително гастрономско патување. Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови. Своите рецепти почнала да ги споделува со своите следбеници и пријатели од почетокот на пандемијата.

„Го сакам секој дел од процесот, но најмногу уживам во фотографирањето на храната“, ни открива Дијана.

Инвентивната Дијана денеска споделува рецепт за едно гастрономско уживање – кари со наут и басмати ориз (посно).

„Ова кари се подготвува за само 20 минути, а добивате превкусен ручек. Одличен рецепт кога немате многу време и ви треба да подготвите нешто брзо и вкусно“, објаснува Дијана.

Потребни состојки:

• 1 мала главица кромид
• 2 чешниња лук
• 1 чили пиперче ситно исечкани
• 1 мало парче ѓумбир ситно исечкани
• 3 лажичиња сол
• 1 лажиче куркума
• 1 лажиче сенф
• 1 лажиче мелен ким
• 1 лажиче мелен коријандер
• 1 лажиче кари
• 2 лажици паста од домати или сос од домати
• 2 конзерви наут (или сварете го наутот сами)
• 1 конзерва кокосово млеко

За оризот:

• 200 грама басмати ориз
• 480 милилитри вода
• 1/2 лажиче куркума
• сол
• бибер

Подготовка:

Главицата кромид исечкајте ja и пржете ја на тивко заедно со чили и ѓумбирот, 10 минути, додека порумени кромидот и се карамелизира. Додадете ги зачините, сенфот и томато пастата и мешајте кратко.

Додадете го наутот и пржете заедно за да ги впие зачините. Додадете го кокосовото млеко и оставете да крчка 10 минути.

За тоа време подгответе го оризот. Исплакнете го и ставете го во тенџере заедно со водата и зачините. Оставете да се вари затворено со капак 10 до 12 минути. За тоа време ќе ја впие течноста.

Послужете го заедно со кари и уживајте.