Македонската А репрезентација го претрпе првиот пораз во квалификациите за пласман на Европското првенство 2024 во Германија.

Нашата најдобра фудбалска селекција во Скопје иако водеше со 2:0 по првото полувреме, во вториот дел ја испушти предноста, откако Украинците направија целосен пресврт.

Украинскиот селектор Сергеј Ребров по мечот изјави дека за неговите играчи второто полувреме беше поразлично.

– Немавме доволно време да се подготвиме за овој натпревар. Беше поразлично за нас во второто полувреме. Благодарен сум на играчите што подобро го разбраа нашиот модел на игра во вториот дел. Игравме поинтензивно. Беше важно што на паузата самите играчи одлучија дека е невозможно да се игра онака како што игравме во првото полувреме – рече Ребров.

По стартниот пораз од Англија, ова беше прва победа за Украина во квалификацискиот циклус, а добрата серија може да ја продолжи за три дена кога во Трнава ќе биде домаќин на Малта.