Фудбалскиот клуб Реал Мадрид објави ново официјално соопштение во кое јасно наведува дека тимот никогаш не ја разгледал можноста за повлекување од финалето на Купот на кралот против Барселона, кое ќе се одржи в сабота (22.00 часот) на стадионот „Ла Картуха“ во Севиља.

– Нашиот клуб разбира дека несреќните и несоодветни изјави дадени од судиите делегирани за овој натпревар, дадени 24 часа пред финалето, не можат да фрлат сенка врз спортски настан од глобално значење што ќе го следат стотици милиони луѓе – се вели во соопштението.

Реал Мадрид особено го нагласува своето почитување кон сите навивачи кои веќе патувале во Севиља или планираат да патуваат за да го бодрат својот тим.

И покрај тензиите и, како што наведуваат, „очигледното непријателство и анимозитет“ на делегираните судии, Реал Мадрид нагласува дека верува оти вредностите на фудбалот мора да преовладуваат.

Клубот со тоа ја потврдува својата решеност да се бори за трофејот на теренот и да го одбрани спортскиот интегритет на финалето.