Новата „персонализирана“ онлајн алатка која ги предвидува најделотворните лекови за поединечни пациенти со дијабетес тип 2 може да им користи на милиони луѓе со оваа состојба, велат истражувачите.

Според податоците на Светската здравствена организација (СЗО), повеќе од 800 милиони луѓе во светот имаат дијабетес, а повеќе од половина од нив не се лекуваат.

Во Англија, помалку од 18 отсто од луѓето со дијабетес ги земаат најдобрите лекови за контрола на шеќерот во крвта, покажа едно истражување.

Алатката што ја осмислиле истражувачи од Универзитетот во Ексетер им овозможува на лекарите да пристапат на интернет и да внесуваат клинички податоци рутински собрани за пациентите со дијабетес. Тие вклучуваат индекс на телесна маса (БМИ), холестерол и HbA1c, тест на крвта што го мери просечното ниво на шеќер во крвта во претходните два до три месеци.

Платформата потоа го препорачува најефективниот лек за намалување на шеќерот во крвта за секој пациент.

Истражувачите рекле дека, според нивните сознанија, нивниот модел е првиот што дава избор помеѓу пет главни класи на лекови, вклучувајќи DPP-4 инхибитори, GLP-1R агонисти, сулфонилуреи, SGLT2 инхибитори и тиазолидиндиони.

Луѓето со дијабетес тип 2 треба да го контролираат нивото на шеќер во крвта за да избегнат компликации како болести на бубрезите и оштетување на нервите.

Метформинот е обично првата линија на лекување, со пет други видови на лекови, исто така достапни, иако делотворноста на овие лекови може да варира од личност до личност.

Алатката е развиена и тестирана со помош на податоци од еден милион луѓе со дијабетес тип 2 во Велика Британија.

Наодите, објавени во „Лансет“, сугерираат дека пациентите кои ги земале лековите предложени од моделот имале понизок HbA1c за 12 месеци и помал ризик од компликации.

Тие пациенти, исто така, имале 38 отсто помал ризик од лоша контрола на шеќерот во крвта во текот на пет години, како и помал ризик од компликации на срцето и бубрезите во период од пет години.

„Ние развивме сосема нов персонализиран пристап за лекување на дијабетес кој може да биде од корист за сите со дијабетес тип 2 во Велика Британија и во целиот свет“, рекол д-р Џон Денис, вонреден професор на Универзитетот во Ексетер, кој ја водеше студијата.

„За првпат, нашиот модел им овозможува на луѓето кои живеат со дијабетес тип 2 брзо да го идентификуваат најдобриот лек за контрола на нивото на шеќер во крвта, што помага да се намали ризикот од компликации од дијабетес“, рекол тој, додавајќи дека ова е голем напредок во однос на сегашниот пристап за избор на лекови за дијабетес.

Професорот Ендрју Хатерсли од Универзитетот во Ексетер рекол дека е клучно нивниот модел да биде имплементиран во клиничка грижа веднаш и без дополнителни трошоци.

„Се надеваме дека ќе можеме брзо да го покренеме моделот за да го направиме достапен за да им помогнеме на луѓето со дијабетес тип 2 во Велика Британија и во светот.“