Британскиот премиер Кир Стармер му порача на својот канадски колега Џастин Трудо за време на денешниот разговор дека го поздравува меѓународниот разговор за важноста на трговијата и соработката, соопшти канцеларијата на Стармер.

„Зборувајќи за неодамнешните глобални настани, премиерот рече дека го поздравува меѓународниот разговор за важноста на трговијата и соработката меѓу сојузниците и партнерите“, се вели во соопштението на Даунинг стрит, пренесе Ројтерс.

Како што беше наведено, лидерите разговараа и за силните трговски односи меѓу Велика Британија и Канада.

Американскиот претседател Доналд Трамп ја суспендираше својата закана за високи царини за Канада во понеделникот, еден ден пред тие да стапат на сила, согласувајќи се на 30-дневна пауза откако Трудо рече дека ќе ги засили напорите за безбедност на границата на земјата.

Британија досега беше поштедена од заканата од царини, наведува агенцијата.

Запрашан дали ќе воведе царини за Британија, Трамп рече дека Британија се однесува „несоодветно“ кога е во прашање трговијата.

Сепак, американскиот претседател навести дека тоа може да се „реши“ меѓу двете земји, пренесува Танјуг.