Младата оперска певица освојува со својот моќен вокал, но и со изгледот и шармот. Полина Тасева е вистинско освежување на музичката сцена, оперска пејачка што успешно плови и во светот на поп-музиката. Харизматичната Полина има богато музичко педигре – дипломирала на отсекот за соло-пеење на Факултетот за музичка уметност – Скопје во 2016 година, а во 2019 година завршила магистерски студии по интерпретација и композиција.

Со Полина денеска разговаравме за една сосема друга тема – музиката ја оставивме малку настрана, а зборуваме за уште една нејзина страст – храната.

Полина плени внимание со својот изглед, па неминовно се наметнува прашањето во што е тајната на нејзината тенка фигура? Дали се потребни откажувања, жртвувања од храната за ваков изглед?

Не го пропушта појадокот

Како Полина го започнува денот, што јаде наутро, дали воопшто има навика да појадува.

– Секое утро најчесто консумирам овесна каша, смути со протеин или солен оброк, кајгана со зеленчук, се трудам да не го пропуштам појадокот. Ако морам брзо да излезам од дома, тогаш јадам некаде надвор. Сите треба да имаме навики што одговараат на нашиот организам, на нашето тело, ако сакаме организмот да не доживува стрес и да си го знае својот ред. Добро е да изградиме навика за сѐ – исхраната, обврските, организацијата… На тој начин телото ќе функционира правилно, а истовремено ќе ја одржуваме и посакуваната телесна тежина – раскажува пејачката.

Полина ни открива дека на нејзиното мени најчесто се наоѓаат салатите, кои ги приготвува со соја сос, балсамико прелив, благо чили и со бел сос.

– Во салатите додавам сончоглед и брусница. А, во комбинација со салатите практикувам да јадам месо или риба – вели Полина.

Дали Полина се храни здраво или, пак, не може да им одолее на убавите но калорични јадења и деликатеси?
Во врска со тоа, дознавме еден интересен факт. Иако главно, луѓето не можат да им одолеат на слатките задоволства, десертите, кај Полина е обратен случај – таа повеќе сака солено отколку слатко.

– Секако дека сум љубител на вкусна храна, понекогаш и повеќе калорична во одредени ситуации. Гурман сум и готвам, а најчесто храната што ја приготвувам е врз база на здрави состојки. Повеќе обожавам солено отколку слатко, и во принцип кога сакам да си дозволам нешто покалорично, тоа се млечни производи и сосови. Мојата лична исхрана низ годините се одвива по мои принципи, си создадов ред и начин што го практикувам подолго време и чувствувам дека добро влијае на моето здравје и тело. Сакам да консумирам семиња, зеленчук, овошје, месо… – вели Полина.

Не држи диети, но има свој режим

Со оглед на нејзината убава фигура, ја прашавме дали практикува диети, дали некогаш држела диета, дали има рестрикции во нејзината исхрана.

– Искрено не сум држела диети, освен што сум воспоставила свој режим што сум го приспособила на мојот начин на живот и функционирање, а притоа да не ми влијае негативно. Затоа што храната е таа што ни дава сила и енергија и доколку не ја консумираме соодветно, може негативно да ни се одрази на здравјето. Најважно е да поставиме цел, да одржуваме баланс, да изградиме навики и да бидеме истрајни – вели Полина.

– Од искуството на блиските пријатели што држеле диета, ги поддржувам доколку се чувствувале убаво и исполнето, а воедно тој начин им одговарал за нивното здравје и постигнале добри резултати – додава пејачката што мисли за диетите.

Со оглед на брзото темпо на живот, кое нѐ ни дозволува секогаш да се храниме онака како што сакаме, Полина објаснува како успева да го менаџира одржувањето на здравјето со секојдневните обврски и дали има време за спортување.

– Спортувам низ годините, не секогаш редовно, но, за среќа, генетски немам предиспозиции за нагло зголемување на тежината и таа нередовност не ми попречила во линијата. Во моментот посетувам вежбална, возам велосипед и наоѓам време за каква било физичка активност, како што се вели: „Сѐ што се сака, се може“. Со добра организација на денот сѐ се постигнува, така што работам на тој случај и се надевам дека успешно ги менаџирам сите обврски, вклучувајќи ја редовната исхрана, спортот и работата.“

Како Полина ја доживува храната…

– Храната е култура и на некој начин таа нѐ претставува нас како личности. Начинот на јадење, количината и изборот на храна. Храната ја доживувам како уживање освен како потреба, сакам да уживам додека јадам, не се брзам и си давам време. Обожавам да јадам во добро друштво и со најблиските, иако се случувало да приготвам оброк само за себе, проследено со филм и чаша вино.

Омилена и неомилена храна

Иако не постои некоја посебна намирница што ѝ пречи, сепак постои храна што ја избегнува.

– Немам нешто особено што ми пречи. Знам да избегнам тешка храна или обилен оброк пред настап, затоа што пред пеење не е пријатно чувството кога си најаден. Од омилена храна ќе ги издвојам полнетите пиперки, обожувам кинеска и мексиканска храна, и нормално ги обожавам нашите традиционални манџи. А, што се однесува на неомилени јадења, што ретко се случува, ќе кажам дека леќата не ја консумирам често.

За Полина, консумирањето течности е од есенцијално значење за здрав организам и убав изглед.

– Најважно од сѐ е да внесуваме течности за да го одржуваме организмот здрав. Наутро пијам вода и цеден сок или смути со овошје, потоа еден од моите омилени појадоци е овесна каша со овошје и путер од кикиритки.

Мислам дека без овие намирници денот не би ми започнал исто како кога не би ги консумирала, така што можам да кажам дека ми е некаков ритуал појадокот и денот да го започнам со овие производи.

Линијата се одржува многу едноставно, никогаш не се прејадувајте, не ги полнете чиниите, не внесувајте течности додека јадете, не бидете лакоми, туку уживајте во храната. Физичката активност е важен дел од целата слика, доколку имате време и не сте мрзеливи, спортувајте.

Рецепт на Полина
Лепчиња со туна и зеленчук печени во рерна
Состојки:

– туна
– пченка,
– кромид
– кисели краставички
– кашкавал
– павлака
– лепчиња
– доматно пире
– магдонос
– зачини по вкус

Подготовка:

Во сад ја ставаме туната, додаваме пченка, сечкан кромид, магдонос, кисели краставички, рендан кашкавал, павлака и зачин по вкус. Сето тоа се меша и смесата се става врз лепчињата кои претходно сте ги премачкале со доматно пире.

Врз смесата може да додадете кашкавал.

Вака приготвените лепчиња во рерна се печат 10 минути, а потоа се подготвени за сервирање.
За декорација додајте свеж кромид, магдонос и црвен пипер.