Независната дискографска куќа „ПМГ Рекордингс“, која од 1998 година ја регистрира, ја официјализира и ја промовира квалитетната македонска музика, со сегментот „ПМГ Џез“ фокусот го стави на современата македонска џез-музика.

Македонската дискографија е збогатена со пет нови извонредни албуми на групите „Светлост“, „Сетстат“ и Мирко Попов (албум снимен во живо), „СД4“, „Кобалт код јунит“ и Јордан Костов квинтет. Албумите се објавени под етикетата на „ПМГ Џез“, сегмент од „ПМГ Рекордингс“, а нивната промоција се случи онлајн во изминатите 30-ина денови.

Пандемијата на коронавирусот не ја спречи, туку напротив ја засили креативната енергија на македонските џез-музичари, кои пронајдоа нови начини на промовирање на своите изданија. За актуелните движења на сцената и за активностите на дискографската куќа „ПМГ Џез“ разговаравме со Мирко Попов.

„ПМГ Рекордингс“ повеќе од 20 години е дискографска куќа што објавува музички албуми со прогресивна, инди, електронска и современа музика. Како се појави иницијативата за сегментот „ПМГ Џез“?

– Џез објавувавме и претходно, со оглед на нашите широки интереси за музика. Фокусот на овој сегмент, како што е тоа обичај за ПМГР, дојде најпрво со порастот на нашиот приватен интерес за овој правец, а сериозно се разви кога јас (Мирко Попов) соработував на албумот „Се плашам од Македонци“ со легендарниот македонски џез-состав „Сетстат“, чиј фан сум повеќе од една деценија.

Креативната размена набрзо прерасна и во искрено пријателство, базирано, пред сѐ, врз љубов кон музиката, па јас и Владан Дробицки (тромбонист и шеф на „Сетстат“) сфативме дека имаме еден куп заеднички интереси. Тоа полека еволуираше во сестрана соработка и на крајот сфативме дека има потреба од специјализирана дискографска куќа посветена на џез-музиката. Оттаму и „ПМГ Џез“.

Досега објавивте 15-ина албуми под етикета на „ПМГ Џез“ во период од околу две години. Дали современата македонска џез-сцена станува поактивна и со колку групи соработувате во овој период?

– Македонската џез-сцена отсекогаш ми делувала солидно активна, но не можам да кажам дека детално сум ја познавал. Од аспект на некој со специјализирана дискографска куќа за џез, работите стануваат кристално јасни и не сум изненаден од изобилството на талент, енергија, разноликост, па и арогантност во една конструктивна смисла. Музиката е наша силна страна. Тоа важи и за џезот. Откривме фантастични музичари со возбудливи интереси и цврсто сме решени да ги промовираме. Ги има навистина многу и во разни комбинации, а ние сме отворени за соработка со сите што ги задоволуваат критериумите за квалитет.

Пред да се случи пандемијата со коронавирусот имаше најава за нов џез-фестивал „Џез крај Вардарот“. Актуелната состојба ги наруши плановите за фестивалот, но колку „ПМГ Џез“ е вклучена во иницијативата и какви би биле идните планови за реализација на фестивалот?

– Да, тоа беше вистински пех за нас. Сѐ беше подготвено, речиси тргнавме и со кампањата и нè престигна оваа глупава пандемија. Но, ние сме мошне сериозни во однос на нашата работа и секако веќе сме во подготовки за реализација на нашиот прв фестивал. Секако, моравме да го осмислиме одново, со оглед на фактот што објективните околности се сосем инакви сега, но мислам дека нашата креативна трансформација со малку среќа, може да резултира со фантастични резултати, а тоа да биде фестивал за паметење. Не само поради „инаквоста“, ами и поради извонредниот квалитет на музиката што ќе се презентира, а тоа се, пред сѐ, наши автентични македонски џез-бендови.

(Разговорот е објавен во „Културен печат“ број 32, во печатеното издание на „Слободен печат“ на 23-25 мај 2020)