Круна на концертната сезона на камерниот оркестар „Профундис“ ќе биде настапот со виолинистот Роман Симовиќ на 16 октомври во големата сала на Филхармонија во Скопје, а концертот е најавен како музички спектакл.

Соработка со светски познати водечки солисти, мултимедијални проекти, гостувања, праизведби и уникатни програмски селекции се главната карактеристика на работата на камерниот оркестар „Профундис“. За активностите поврзани со претстојниот концерт и воопшто за работата на оркестарот разговаравме со диригентката Ѓурѓица Дашиќ.

Какви се подготовките за настапот со Роман Симовиќ?

– Како што е јаготката на врвот на шлагот, така е настапот на Роман Симовиќ и „Профундис“ за крунисување на нашата интензивна концертна сезона оваа година. Концертот дефинитивно го најавивме како спектакл поради повеќе аспекти, а секако тука го ставаме акцентот на брилијантната изведба на светски прославениот Роман Симовиќ, концерт-мајстор на престижната Лондонска филхармонија и еден од моментално водечките виолинисти во светот, чие гостување како солист на нашиот концерт уште еднаш го потврдува статусот на „Профундис“ како водечки уметнички камерен состав во Македонија, но и во регионот.

Секако, да не ја заборавиме и уникатноста на програмата, па така на големата сцена на Филхармонија ќе прозвучат делата на тројцата најголеми британски композитори Вилијам Волтон, Вилијам Лојд Вебер и Ралф Вон Вилијамс, како и спектакуларните „Четири годишни времиња“ од Астор Пјацола. Сето ова, проткаено со финеси и грациозност какви што само може да отсвират Роман Симовиќ и „Профундис“ се гаранција за концертен спектакл кој со сигурност ќе ги воодушеви присутните.

Подготовките се исклучително интензивни, како технички и организациски, така и уметнички, особено со наближувањето на датумот на концертот, меѓутоа верувајте дека и во музиката важи изреката дека не е сѐ во крајната дестинација, туку во патувањето, па така можам слободно да кажам дека со радост патуваме низ овие предизвици.

Претходно имавте серија концерти со познатата виолинистка Ирина Мурезану во Скопје, во Белград и во Нови Сад. Како воопшто дојде до можноста за соработката со оваа извонредна виолинистка?

– Ирина Мурезану е драг пријател и долгогодишен соработник на нашиот камерен оркестар. Во една изјава за српските медиуми за настапот во Нови Сад таа изјави дека нѐ чувствува толку блиски, како да сме една голема фамилија, што дефинитивно само ја потврдува нашата извонредна соработка. Со Ирина имавме концертен патувачки омнибус во три града – Скопје, Белград и Нови Сад и се надеваме дека во новата сезона ќе ги прошириме овие настапи во регионот, па и пошироко. Можам само да ја потенцирам благодарноста што ја имаме за афирмацијата на уметничкиот квалитет кој Ирина го препозна во нашиот камерен оркестар, а е дополнителна потврда за трудот кој сите заеднички го вложуваме во „Профундис“.

Камерниот оркестар „Профундис“ постои веќе четири години и познат е по оригиналноста на изведбите на дела од различни композитори и епохи. Како и со која цел дојде до формирањето на оркестарот?

– Камерниот оркестар „Профундис“ се формираше во време кога во Македонија немаше активни камерни оркестри. Желбата да се здружиме со една идеја и да создадеме нешто вредно, втемелено на вистински вредности, организирано, професионално и во кое ќе се вложиме со целиот наш уметнички потенцијал беше пресудна за нас – неколку колеги од оркестарот на Националната опера и балет. Сакавме да создадеме модерен, оригинален и високо квалитетен уметнички состав кој ќе биде вистински репрезент на македонската културна сцена во нашата земја и пошироко, сѐ со цел врвните македонски изведувачи да имаат репрезентативен оркестар со кој би настапувале и поместување на тогашните граници во изборот на програмата. Дополнително, пристапот кон работниот процес, изборот на солисти, како и квалитетот на изведбата беа наш врвен приоритет.

Од тогаш, во текот на овие четири години се редеа успешни настапи и растењето, кое го прифативме со огромна радост, беше неизбежно. Досега имаме реализирано 27 концерти, голем дел од нив со врвни македонски солисти, и во другиот дел познати имиња од светската класична музичка сцена, кои со големо задоволство ја прифаќаа соработката за нашите настапи, а публиката секогаш нѐ наградувала со стоечки овации. Иако како бројка не звучат многу, четири години за нас значат големо искуство, вложен труд и голема радост во творењето и можноста да бидеме оригинални во изведбата, по стилот на европските и светските камерни оркестри со кои нѐ споредуваат.

Впрочем, тоа беше и нашиот spiritus movens во креирањето на „Профундис“. Сметаме дека уникатноста и креативноста се навистина пресудни во денешното секојдневие и се дефинитивно победничка формула за успех, а тие се, секако, во темелите на нашиот камерен оркестар. Оставаме публиката и концертите да бидат потврда за квалитетот и вредноста која „Профундис“ ја има како изграден бренд.

Како вие се најдовте во улогата на диригентка на оркестарот и што лично ви значи работата со „Профундис“?

– Да се биде на кормилото на „Профундис“ е голема одговорност, предизвик, љубов, влог, понекогаш стрес, многу често радост и среќа, но најмногу од сѐ гордост и привилегија! Драго ми е што и моите колеги го препознаваат тоа, што за мене е само дополнителен поттик во мојата приказна со камерниот оркестар. Секако, како и сѐ во животот, цело е кога има сѐ, па така и јас не можам без моите драги колеги, кои верувајте ми даваат голема поддршка, заеднички да ги креираме успесите на нашиот „Профундис“.

Во април годинава во Скопје го одржавте концертот „Грув“, летово настапивте со пијанистката Ема Попивода во Котор, претходно оркестарот настапи и на фестивалот „Раванелиус“ во Србија, а есенва имавте концерт во Нови Сад. Дали само квалитетот на оркестарот е пресуден за учеството на сите овие престижни фестивали?

– Да, вака кога ќе се набројат навистина звучат моќно, но тоа се успесите на „Профундис“ оваа концертна сезона. Секој од овие настани кои ги наброивте се уникатни и богати во вредноста, со своја оригиналност. Концертот „Грув“ беше синергија на визуелната магија со класичната музика, своевиден спектакл со 3Д визуелни ефекти и Драган Ѓорѓевиќ – Сузуки, виртуоз на виолончело на сцената, кој ја фасцинираше публиката. Богатото работно лето на „Профундис“ со настапите на најпрестижните регионални фестивали „Раванелиус“ и „Котор Арт“ беа исклучителен момент и афирмација за вредноста на нашиот бренд, но и можност да бидеме амбасадори на македонската култура, што за нас е од особено значење.

Квалитетот не е предуслов, туку дефинитивно е само резултат на посветеноста, трудот, заедничката креативна енергија, желбата да се направи нешто поинакво и уникатно, и секако, вредноста во изведбата – а, јас сум уверена дека со оваа концертна сезона поставивме стандарди и го докажавме тоа.

Кои се следните планови на оркестарот?

– Да бидеме уште поуспешни и покреативни во новата концертна сезона! (се смее) Во недостатокот на конкуренција, сѐ додека постои мотивација, ќе продолжиме самите да се предизвикуваме во изведбата и уникатните концертни спектакли. Подготовките за следната година се во полн ек и можам само да кажам дека нѐ очекуваат нови соработки со светски познати водечки солисти, мултимедијални проекти, бројни гостувања, праизведби и уникатни програмски селекции, кои сум сигурна дека нашата публика со нетрпение ги очекува.

(Разговорот е објавен во „Културен печат“ број 200, во печатеното издание на весникот „Слободен печат“ на 14-15.10.2023)