Скопското обвинителство соопшти дека повело истрага против 26-годишен скопјанец бидејќи постои основано сомнение дека сторил кривично дело разбојништво и две дела тешка кражба.

„На 20 декември 2024 година, осомничениот дошол пред врата на стан на улицата „Венјамин Мачуковски“ во Аеродром и тропнал на вратата. Кога сопственикот излегол, осомничениот физички го нападнал со тупаници, од раката му го одзел мобилниот телефон, а кога оштетениот паднал на земја, му одзел уште 1.200 денари“, соопшти Обвинителството.

Шест дена подоцна, истиот разбојник, заедно со еден малолетен соизвршител, извршил тешка кражба во угостителски објект во Аеродром, на булеварот „Кузман Јосифовски-Питу“. Двајцата провалиле во објектот и украле мобилен телефон кој го нашле.

„Уште една тешка кражба извршил осомничениот на 18 јануари годинава, кога насилно влегол во пицерија на улицата „Фрањо Клуз“. Оттаму украл 3.000 денари, клуч од касата и шишиња пиво, во вкупна вредност од 12.000 денари. Јавниот обвинител до судијата на претходна постапка достави предлог за определување мерка притвор за осомничениот“, се вели во соопштението на ЈО.