Дуќаните се излепени со огласи за сезонски попусти, акции, купи три, плати две парчиња, а некаде се рекламира т.н. „Црн петок“ (Блек фрајдеј) и во лето. Трговците не го фермаат законот што дозволува сезонски намалувања само двапати годишно – летно од 25 август до 25 септември и зимско од 25 декември од тековната до 25 јануари од наредната година. Новиот Закон за заштита на потрошувачите е дециден, но трговците би сакале намалувањата да траат цела година. Како и да е, граѓаните одамна не паѓаат на ваквите трговски финти и сосема се свесни дека производите на попуст или на акција се со исти или поскапи цени отколку што чинеле претходно.

– Си го видов шпоретот на попуст, а го имам веќе неколку години и цената му е поскапа за 1.000 денари. Не им верувам на акциите, кај нас сè е лажно, па речиси и да нема вистински намалувања како што е редот во странство – вели една скопјанка.

За да се избегнат ваквите финти, законот е јасен – додека траат попустите, на производите може да има само две етикети со цена – односно со онаа највисоката или онаа на која се снижува. Ваквото прецизирање е со цел да се избегнат претходните практики, на лажно етикетирање, со кое демек на граѓаните им се става до знаење колку „заштедиле“ со тоа што купиле стока на намаление.

Меѓу другото, стоките или услугите ставени на акциска продажба мора да бидат јасно, видливо и читливо означени со зборовите „акција“ или „акциска продажба“. Значајно за потрошувачите е и дека кујнските и другите апарати од белата техника или другите производи може да се заменат со нов ако двапати се расипат од истата причина во определениот гарантен рок. Со новиот закон се предвидуваат и казни до 10.000 евра за нечесните, измамничките и агресивните трговски практики, со цел да се спречи и нелојалната конкуренција и профитерство на грбот на потрошувачите определил законодавецот.

За да им се објасни на граѓаните што може да очекуваат во трговијата, Државниот пазарен инспекторат изготви брошура со насоки, нудејќи поедноставено објаснување на новиот Закон за заштита на потрошувачите.

– Промотивна продажба се однесува на нови производи и таа треба да трае во рок не подолг од 8 дена. Акциска продажба, пак, е намалување на цена на ограничен број производи, која се спроведува во рок не подолг од 30 дена. Законот за заштита на потрошувачите стапи во сила пред две години во ноември, што се совпадна со периодот на сезонски и претпразнични намалувања на цените на стоки и услуги, за што имавме јавувања на поголем број потрошувачи – посочуваат од ДПИ.

Меѓу другото, флаерот нуди објаснување дека трговците мора јасно и видливо да ја означат грешката на понудениот оштетен производ, а оние производи на кои им изминува рокот, а се со пониски цени, мора да бидат јасно истакнати. Инаку, распродажба на производи е дозволена само ако трговецот престанува со работа, се сели во друг дуќан, престанува да нуди одредена стока или врши реновирање.

Новиот Закон за потрошувачи за разлика од претходно предвидува различни казни за малите и големите компании. Така, за мали фирми има глоби од 500 до 1.000 евра, како и 150 евра за одговорното лице. Двојно поголеми се паричните казни за мал трговец, а највисока е казната за големите трговци што се движат од пет до десет илјади евра, како 500 евра за одговорното лице. Казни од 50 евра се предвидени и за трговците поединци.

Ем летуваат ем пазаруваат, грчките распродажби се во полн ек

Почна летната продажна сезона во Грција, а годишниот „ритуал“ почна на 8 јули и ќе заврши на последниот ден од август. За време на туристичката сезона, летните распродажби се уште една атракција за странските туристи во трговските центри и продавници. Според сегашниот закон, продавниците можеа доброволно да отворат во првата недела од летната распродажба (оваа година 14 јули), од 11 до 20 часот.

Треба да се истакне дека според новиот Закон, трговците се обврзани на купувачите да им ја претстават продажната цена на артиклите како и нивната претходна цена, со важност најмалку во последните 30 дена пред почетокот на продажбата. Сопствениците на продавници може да го додадат и процентот на намалување на цените на ознаките на артиклите. Доколку некој артикал се наоѓал на пазарот помалку од 30 дена, неговата оригинална цена на која ќе се однесува продажната цена е претходно најниската по која се продавал. Доколку 60 или повеќе проценти од сите артикли што ги продава продавница се на продажба, клиентите треба да се информираат со објави на излозите. Исто така, доколку различни категории артикли подложат на различни резови, клиентите треба да се информираат за фактот со написи на излозите, кои го дефинираат најнискиот и највисокиот процент од нивната продажба.