Распишан е конкурс за нови композиции за 31. издание на Интернационалниот музички фестивал „Охрид-фест – Охридски трубадури“ кое ќе се одржи на 30 и 31 август 2024 година, на најубавата сцена на Балканот на Долни Сарај во Охрид.

На фестивалот ќе се случуваат две вечери, Фолк и Интернационалната. Фолк- вечерта ќе се одржи на 30 август и освен новосоздадени фолк-песни од нашата земја, со свои нови композиции ќе можат да учествуваат и странски автори – од регионот и пошироко. Интернационалната вечер е закажана за 31 август годинава.

„Охрид фест – Охридски трубадури 2024“ целиот акцент го насочува на новите пејачки надежи – соочени со константен недостиг на млади пејачи, фестивалот дава голема подршка на дебитантите, охрабрувајќи ги да настапат на 31. издание на „Охрид фест- Охридски трубадури“, и во Фолк и во Интернационалната вечер.

Ова е извонредна шанса за промоција на дебитантите, бидејќи фестивалот го следат повеќе од 15 телевизии од Балканот што е извонредна можност за нивното промовирање. На истата сцена, во 1998 година Тоше Проески ја испеа „Усни на усни“ и го започна својот блескав музички пат.

Условите за учество на „Охрид фест – Охридски трубадури 2024“ се:
– Назнака – за која фестивалска вечер е наменета песната (Фолк, Интернационална);
– Демо-снимката и текстот треба да се на македонски јазик;
– Наслов на композицијата;
– Композициите да не се изведувани;
– Податоци на авторите (име, презиме, авторската улога во тимот), и контакт информации;
– Демо-снимките треба да бидат со пратечки инструменти, пијано и гитара.

На конкурсот можат да учествуваат сите домашни и странски автори кои ги исполнуваат условите за учеството а рокот за поднесување на пријавите е до 1 јуни 2024 година. Своите композиции авторите треба да ги испратат на следната електронска адреса: [email protected].

(Комерцијален текст)