По распадот на владејачката коалиција во Германија, постојат наговестувања за можно одложување на одлуката за натамошни испораки на оружје за Украина, вклучително и беспилотни летала. Според извештаи од германските медиуми, особено се очекува одложување на испораката на 812 извидувачки беспилотни летала од германската компанија „Квантум“, во вредност од 153 милиони евра.

Како што јави „Шпигел“, пред распадот на коалицијата, германскиот канцелар Олаф Шолц имал разговори за можноста за доделување дополнителни три милијарди евра за воена поддршка на Украина. Сепак, овој план се најде во неизвесност, бидејќи владејачката коалиција е во криза и буџетот за овие трошоци веќе е исцрпен.

До сега, Германија испрати оружје во Украина во вредност од речиси осум милијарди евра во оваа година, но средствата за понатамошна воена помош се ограничени. Украинските власти, пак, инсистираат на донесување на одлука за продолжување на испораките на оружје пред вонредните парламентарни избори во Германија.

„Мора да се направи сè што е можно за да се обезбеди непречено спроведување на планираните налози и финансирање на дополнителна помош за Украина во новата година“, изјави украинскиот амбасадор во Германија, Алексеј Макеев, во интервју за „Шпигел“.

Во рамки на оваа воена поддршка, Германија оваа година веќе испрати 348 извидувачки беспилотни летала „Вектор“ од компанијата „Квантум“, а до крајот на годината се очекува да пристигне уште еден пакет од 127 беспилотни летала. Планирана е и испорака на до 4.000 борбени дронови од друг германски производител, но украинските власти засега не ја откриваат точната врста на овие беспилотни летала.

Одложувањето на одлуката за понатамошни испораки на оружје може да предизвика дополнителни тензија помеѓу Германија и Украина, особено во контекст на растечката воена помош потребна за одбраната на Украина во текот на војната со Русија.