Градоначалникот на Струга од редовите на ДУИ, Рамиз Мерко, кој една и пол година фигурира на „црната листа“ на Соединетите Американски Држави поради сомневања за учество во корупција, од вчера е ставен на т.н. „стоп-листа“, а денеска му е одземен и пасошот, пишува на социјалните мрежи пратеникот од владејачката коалиција „Вреди“, Беким Ќоку.

Според него, мерките се преземени за да се спречи евентуалното бегство на Мерко, откако поранешниот вицепремиер и сопартиец на струшкиот градоначалник, Артан Груби, кој е осомничен за милионска проневера во Државната лотарија, избега од државата пред да биде уапсен.

„Рамиз исто така е крупен, па ќе треба поголем куфер или багажник за да се прошверцува преку граница“, напиша пратеникот во објавата.

Во овој мандат, против Мерко се поднесени вкупно девет обвиненија, а во претходните три мандати, против него беа поднесени 14 кривични пријави, но само еден предмет беше процесуиран во струшкиот Основен суд.