Екипата на МЗТ Скопје започна да го комплетира тимот со кој во идната сезона ќе ја брани двојната круна во домашните натпреварувања како и во АБА2 лигата, а првите чекори ги направи со задржување на  актуелниот кадар.
„Металците“ и во наредната сезона ќе бидат предводени од Дарко Радуловиќ, кој успешно седна на клупата кон средината на март и ја донесе двојната круна. Радуловиќ потпиша нов едногодишен договор. Во екипата најмалку до крајот на следната сезона ќе бидат и Бојан Крстевски и Адем Мекиќ, кои исто така ја продолжија соработка. Потпис на двегодишна соработка со МЗТ Скопје стави и Дамјан Робев (24 год, 195 см), зад кого е одлична сезона во Куманово.

Се очекува преговорите да продолжат и со МВП на финалната серија, Андреј Магдевски кој моментно се наоѓа на заслужен одмор.