Македонецот Раде Илиевски (61) е прогласен за најдобар наставник во конкуренција на наставници од земјите на некогашна Југославија. Илиевски, кој е и пливачки тренер, ова признание го доби од страна на Асоцијацијата на најдобри наставници од земјите на некогашна Југославија.

Прогласувањето се случи на шестата меѓународна конференција на оваа Асоцијација во Бања Лука што се одржа од 4 до 7 април.

– Добитник сум на титулата најдобар наставник на просторите на некогашна Југославија. Оваа награда за мене е големо задоволство, особено и затоа што ја добив во конкуренција на навистина голем број други наставници – вели Илиевски, кој информира дека на споменатата конференција учествувале над 210 негови колеги.

Покрај наградата Стојановски добил и Сертификат за несебична помош и поддршка во афирмацијата на наставничката професија во земјите од некогашната СФРЈ.

Илиевски е наставник по физичко и здравствено образование во ООУ „Исмаил Ќемали“ во Чаир, Скопје, а вели дека овие признанија за него претставуваат континуитет врвни и успешни постигнувања во наставните и воннаставните активности. Тој инаку е и пливачки тренер. Тој е добитник на над 277 други сертификати и дипломи на државно, градско и меѓународно ниво.