Во петтото коло од групната фаза во АБА 2 лигата, кошаркарите на Работнички се поразени од Сутјеска (94:75).

Играчите на Сутјеска беа подобар противник од некомплетниот тим на скопските „црвено-бели“, и стигнаа до сигурен триумф во регионалното натпреварување.

Ефикасно прво полувреме одиграа екипите на Сутјеска и Работнички. А по истекот на 20 минути, онаа од Никшиќ се стекна со предност, но не голема, изразена со четири поени (49:45).

Во скратената ротација со која располагаше тренерот Горан Самарџиев во која ги немаше репрезентативецот Стојан Ѓуроски и првиот стрелец Имран Полутак, Капетановиќ реализираше 11, а Ефремовски уште 10 поени во тој прв дел од играта.

Но, во продолжението, како одминуваа минутите така паѓаше играта на Работнички. По три одиграни четвртини, Сутјеска се одвои на двоцифрен плус (71:60). Немаше доволно енергија во играта на Работнички во тоа второ полувреме, евидентирано и во оној последен период во кој домашната екипа изгради уште повисока предност. Во 35 минута домаќините имаа вишок од 18 поени (83:65), и мирно го приведоа натпреварот до крајот.

Во тимот на Самарџиев најкорисен беше ефектот на Амар Хот, кој дојде до двоен скор од 12 поени и 13 скока. Најмногу, 18 поени, уфрли новакот Капетановиќ, Ефремовски го следеше со 15, Робев имаше 12, а Дубински уште 10 поени.

По пет одиграни кола, Работнички и натаму е без победа. Во последниот круг од оваа прва фаза на 18 декември ќе игра пред својата публика во СРЦ „Кале“ против Војводина од Нови Сад.