Безмилосно искористување на работната сила е само дел од коментарите со кои продавачките ја дочекаа наредбата дека на 31 декември ќе работат до 20 часот. Според нив, по осумте часа поминати зад касите, во редење на стоката и разместување на палетите, откако ќе затворат ќе мора и да зачистат. Тоа значи дека дома нема да бидат пред 22 часот, оти најголемиот дел од нив не живеат во близина на работното место.

Маркетите ќе бидат затворени само на 1 јануари, но оние во шопинг моловите ќе дежураат и на тој ден и тоа до 20 часот. Црниот хумор на продавачките се сведува на констатацијата дека откако ќе зачистат, слободно може да ја пречекаат Новата година во дуќаните. За разлика од нивните колешки што работат во трговските центри, чијашто дневница во ден на неделен одмор и за празници е зголемена за 50 отсто, тие може да сметаат само на редовната саатница.

– Ова е срамота. Овие денови е лудница. Нозете ни се како диреци, рацете ги истегнавме од влечење, а оние што работат во деликатесниот сектор веќе не ги ни чувствуваат. И ние сме луѓе. Низ нос ќе ни излезе Новата година. Не ни помислувам на прослава, само креветот го гледам. Утешително е што не отвораме на 1 јануари, оти колешките што живеат далеку се шегуваа дека ќе преспијат овде за да не трошат пари за превоз. И ние имаме семејства, за што ќе бидеме способни? За славење сигурно не – реагираат продавачките во еден скопски трговски синџир, кој на 31 декември ќе работи до 20 часот!

Инаку, професијата продавач, не само според светските статистики, туку и според нивната побарувачка, беше една од најбараните и во 2024 година! Во моментот на македонскиот пазар на трудот се бараат речиси 1.000 продавачи, покажуваат најновите податоци на Агенцијата за вработување, а бидејќи секојдневно се зголемува бројот на нови трговски центри и ретаил паркови, јасно е дека во догледно време нема да има зима за трговците.

Трговските синџири речиси целата оваа година не запреа со огласите, со примамливи бонуси, бенефиции, а еден од најголемите трговски синџири исплати и К-15 во вредност од 41.000 денари, сума што е четири пати повисока од онаа што ја примија дел од административците (11.000 денари)! Дел од порталите што нудат огласи за вработување, за „Слободен печат“ велат дека благодарение на високата побарувачка за работна сила во трговијата во втората половина од годинава, вкупниот број објавени огласи за вработување ги надминал бројките од рекордната претпандемиска 2019 година.
Во моментов продавачи се бараат не само за во бутиците на познатите брендови, туку и за во пекарници, продавници за долна облека, цвеќарници, бела техника, играчки, во јувелирници, бижутерии, слаткарници…

Во огласите веќе подолг период е избришана графата „со искуство“, а газдите сфатија дека тој недостиг се надоместува со обука. Сè поретки се и огласите на определено време, а нема ограничување и во образованието. Инаку, сите се согласуваат дека најтешко им е на работниците во дисконтните маркети, каде што се работи за четворица – се прима и середи стока, се услужува, се наплаќа и се чисти.