Советот на федерацијата, Горниот дом на рускиот парламент, денеска едногласно го одобри барањето на претседателот Владимир Путин за испраќање војници во двете самопрогласени републики во источна Украина, нарекувајќи го „мировна мисија“. Одлуката стапува во сила веднаш, рече во расправата еден од пратениците.

Обраќајќи им се на пратениците за време на вечерната седница емитувана на веб-страницата на Советот, еден од замениците министри за одбрана рече дека Русија нема друг избор освен да побара одобрение за распоредување трупи во странство. Како што гласаа пратениците, претседателот Владимир Путин ги ратификуваше договорите за пријателство со двата сепаратистички региони што ги призна еден ден претходно, соопшти Кремљ.

Ова и овозможува на Русија да изгради воени бази, да распореди војници, да договори заедничка одбрана и да ги продлабочи економските врски, пишува Ројтерс.