Издавачкиот центар „Три“ почна серија книжевни средби меѓу книгите во рамките на Зимскиот фестивал на книгата. Во периодот од 21 до 31 јануари, во книжарницата на „Три“ во Градски трговски центар (ГТЦ) се одржуваат средби меѓу писатели и читатели со читања, разговори и размена на топли зборови.

Од „Три“ подготвуваат и изненадувања во рамки на фестивалот. Сите настани се од отворен карактер и добредојдени се сите кои сакаат да уживаат во срдечни дружења со добри книги и одлични автори, во топла книжевна атмосфера.

– Книгите се топол дом оваа зима. Затоа издавачкиот центар „Три“ реши книжевните средби да ги одржи меѓу книгите, во книжарницата во ГТЦ. Почнавме со копнежлив книгокруг со поетско читање од „Антологија на копнежот“, со стихови кои допираат до најскриените катчиња на душата – истакнуваат од „Три“.

Книжевната средба за „Антологија на копнежот“ се одржа на 21 јануари. Средбата беше отворена од поетесата и приредувачка на антологијата, Виолета Танчева Златева, а присутните имаа можност да слушнат поезија од македонските поети што се застапени во антологијата.

Во антологијата се објавени стихови за копнежот од Елизабета Баковска, Зоран Анчевски, Сузана В. Спасовска, Марина Мијаковска, Андреј Ал-Асади, Јулијана Величковска, Владо Поповски, Лира Бојку, Иван Антоновски, Снежана Стојчевска, Даим Мифтари, Сеида Бегановиќ, Жарко Кујунџиски, Делвина Крлуку, Ивана Јовановска и други.

Вториот книгокруг – „Без цензура“, ќе се одржи на 27 јануари (понеделник), со почеток од 19 часот, по повод второто издание на првиот роман на писателката Румена Бужаровска – „Тони“.

Третиот книгокруг е посветен на лепословието на Венко Андоновски. Книжевната средба ќе се одржи на 29 јануари (среда) и е посветена на најновото дело на македонскиот писател и професор, „Опијатите на лепословието“ – лична теорија за романот, расказот и драмата.

– Како што вели Андоновски, лепословието се пишува исклучиво на мајчин јазик, па на третиот книгокруг ќе ги славиме македонскиот јазик и сите негови игри и трансформации преку делото за кое тој вели дека е негов личен „прозен готвач“ полн со рецепти за тоа како да се искали еден книжевен текст – истакнуваат од „Три“.

На 30 јануари (четврток), во скопската „Јуроп хаус“, со почеток од 19 часот, ќе се одржи промоција на романот „Ѕвезди под клепките“ од современиот бугарски писател Николај Терзијски. Романот во 2023 година ја доби Националната награда „Христо Г. Данов“ за придонес во книжевноста и е номиниран за сите значајни прозни награди во Бугарија.

Станува збор за раскошен роман за најзначајните и најтешките животни прашања и дилеми. Повеќеслојна сага со три испреплетени приказни во кои палимпсестно се испишани најмалку уште толку, колку лични толку и универзални. Романот дава можен одговор на некои од најголемите загатки на животот: каде, кога и како ја среќаваме љубовта.

На 31 јануари (петок), со почеток од 19 часот, во книжарницата „Три“ во ГТЦ продолжува гостувањето на Терзијски, овој пат во подиректна средба со читателите и со потпишување на неговиот роман.

(Текстот е објавен во „Културен печат“ број 265, во печатеното издание на весникот „Слободен печат“ на 25-26.01.2025)