Фудбалскиот клуб Реал Мадрид во последниве недели често се жали на судењето и смета дека е неправедно казнет на многу натпревари. По голема врева, претседателот на Ла Лига Хавиер Тебас се огласи и рече дека тимот на кој тој е навивач премногу плаче за одлуките на теренот.

Тебас јавно призна дека е навивач на Реал Мадрид. Сепак, тој се труди професионално да си ја врши работата и не прави отстапки спрема „Кралевите“.

Од неговите зборови може да се заклучи дека му е преку глава од постојаното кукање кое доаѓа од Мадрид во изминатите неколку недели, а причина за тоа се судиските одлуки. Реал дури се закани дека ќе се повлече од лигата, но Тебас верува дека таквата одлука е невозможна.

– Не можам да го замислам Реал Мадрид без Ла Лига. Тоа е невозможно. Претседателот на Реал, Флорентино Перез не е навикнат да губи, затоа е упорен и тврдоглав – изјави Тебас.

Тебас најавува промени во судиската организација и јасно тврди дека Реал и Барса очигледно најмногу профитираат од грешките кои се случуваат.

– Сакаме да го промениме судискиот систем. Ако ги прашате другите клубови, сите тие ќе ви кажат дека Реал Мадрид и Барселона најмногу профитираат од судиските одлуки. Сепак, тие немаат ТВ канал за да го кажат тоа јавно. Реал ТВ е единствениот медиум кој ја турка приказната за судиите. Имавме многу полемики со судењето, но нема решение на повидок во Фудбалската асоцијација. ТВ Реал Мадрид и клубот дополнително ја зголемуваат контроверзноста со објавување лажни извештаи и преиспитување на сето она што се случува на теренот – се зборовите на Тебас.

Потоа кажа зборови кои нема да им се допаднат на навивачите на Реал Мадрид.

– Реал Мадрид е клуб кој постојано се жали и плаче. Тие се жалат за минатиот викенд, за следниот викенд, се жалат на се и мислат дека се е теорија на заговор. Познавам многу навивачи на Реал кои нема да се согласат со мислењата што ги има клубот. Па, сопругата на шефот на Реал Мадрид е во судискиот комитет. А тоа што го нападнаа Мунуера Монтеро нема никаква смисла бидејќи нема приказна – кажа Тебас.