Денеска пелагониските млекопроизводители излегоа на протест пред подрачната единица на Министерството за земјоделство и шумарство во Битола.

Незадоволните млекопроизводители побараа одговор од министерот за земјоделие Љупчо Николовски и од директорот на Платежната агенција зошто не им се исплатени парите за субвенции за предадено млеко за цела 2022 година, како и за трите први месеци од оваа година.

„Ги бараме субвенциите за 2022 година да ни се исплатат до крајот на месецот во целост. Во спротивно ќе ги блокираме дел од патиштата“, рече Тони Петковски, претседател на Здружението Пелагониско поле од селото Велушина.

Тие велат дека поради нередовното плаќање субвенции, младите земјоделци ја напуштаат државата и не сакаат повеќе да работат.

Млекопроизводителите се пожалија дека и имаат проблеми и со исплатата за грло добиток и неплатен долг од УЈП за две години – 2021 и 2022 година.