Десетици јеменски демонстранти упаднаа во претседателската палата во јужниот пристанишен град Аден, барајќи исплата на платите во јавниот сектор, јави агенцијата „Анадолија“.

Премиерот на Јемен, Маеин Абдулмалик и другите членови на меѓународно призната влада и натаму се затворени во зградата, соопштија двајца јеменски официјални лица.

Поголемиот дел од Аден е контролиран од силите на сепаратистичкиот јужен преоден совет (СТЦ), поддржан од Обединетите Арапски Емирати, кој во минатото се бореше против владата на Абд-Рабу Мансур Хади.

Кабинетот на Абдулмалик беше формиран минатата година за да ги обедини СТЦ со владата на Хади и да ја исполни саудиската цел да се стави крај на расправијата меѓу сојузниците на Ријад.

Двете групи се главните јеменски фракции во сојузот поддржан од Саудиска Арабија, кој се бори против Хутите, кои го контролираат северот, вклучително и главниот град Сана.

Протестот денеска почна во јавните служби и откако владата не исплати плати на пензионираните војници, нагласија сведоци.