Револтирани од, како што велат, насилното инсистирање на градоначалникот на Општина Карпош по секоја цена да го истурка носењето на контравезниот ДУП, граѓаните од Трнодол се подготвуваат за протести и неколку тужби кон Општината, градоначалникот, а можеби и кон општинските и градски советници.

Граѓаните најмногу реагираат бидејќи Општината ја закажа јавната презентација во работно време во вторник од 15.30 минути иако граѓаните барале таа да биде одржана, како што велат, во нормално време после 17 часот.

Од здружението „Трнодол“ велат дека веќе е поднесена преставка пред уставниот суд за преиспитување на носење на новиот регулациски план донесен во Јуни месец 2018 година, од страна на Град Скопје и каде на чуден начин е поделена населбата и споена со Шпанско село а се со цел да може да се издејствува помала густина на населението.

– Целата постапка е контравезна уште од самиот почеток кога во сред лето беше распишана јавна презентација со непрофесионално изработениот предлог ДУП, а сега пред нова година пред славата свети Никола се брза да се донесе ДУП , кој може да предизвика лизгање на големи земјани маси поради градење во заштитно зеленило под брдото и во заштитниот канал од поплави. Истивремено се загрозува и сообраќајната безбедност на улица Козле и Трнодол, како и отварање на можност за градежна инвазија и градење на населба, која навлегува во заштитното подрачје на Парк шумата Водно, а која ќе се протега над контравезното Шпанско село и над населбите Трнодол, Жданец и Козле, а до која е планирано да се пристигнува преку планираната јужна обиколница и сервисниот пат кои треба да поминува низ самата населбата Трнодол по несоодветни и тесни улици, велат од „Трнодол“.

Граѓаните бараат градоначалникот да биде совесен и разумен и да го повлече предолжениот ДУП и согласно позитивните законски прописи за безбедно станување, да предложи до Советот на општината да донесе мораториум за градба и издавање дозволи за градба во ризичното подрачје како што се брдата под Трнодол и Жданец. Тие велат дека за оваа опасност постои истражување од 2010 година нарачано од Општината и уште едно испитување кое е реализирано од германската амбасада. Резултатите од тие испитување се дека населбата Трнодол лежи на потенцијално нестабилна почва. 

– Со еден збор се планира нова населба која би била копија на онаа околу бившиот хотел „Панорама“ а која повеќе би наликувала  на Дебар Маало отколку на Парк- шума како што засега се именува.
Спорен детаљ се и маркиците за градба кои се директно позиционирани врз каналот што ги собира водите од планината. Планираните петокатници дефинитивно ќе го загрозат слободниот проток на води  во случај на големи дождови и додатно ќе го поткопаат брдото.
Факт е дека една од спорните маркици е згради под брдото, во појасот на заштитно зеленило, се од времето на Стефче Јакимовски од 2002 и 2010 година а последиците од тоа неразумно градење се јасно видливи денес, велат од здружението, и најавуваат масовни протести заедно со граѓаните од населбите Козле и Жданец, на неколку локаци низ општината.

Од друга страна, градоначалникот Стефан Богоев уверува дека на Трнодол нема да му се случи тоа што му се случи на Дебар маало.

Богоев: Нема да дозволиме „дебармаализација“ на Трнодол