Во Уметничката галерија при НУ Музеј Куманово на 24 октомври, во 20 часот, ќе биде отворена просторната инсталација и видео „Мементо мори“ на Страхил Петровски.

– Мултимедијалниот проект „Мементо мори“ е фотографска и видеоинсталација која нуди повеќеслојно значење, иницира повеќе прашања и нуди различни толкувања на размислите кои се однесуваат на егзистенцијалното, при тоа позиционирајќи се себе си како автор и ангажиран критичар на реалноста на современото општество.

Што се однесува на самата нарација во делата, тука го претставувам своето наталожено искуство и став за импактот на колективната и особено лична одговорност (изгубена во лавиринтите на обременетата динамична и конфузна технолошка денешнина на информацискиот хаос…), низ комплексни слоеви од универзални значења.

Идејата има длабока стратиграфија, а јасен и концизен концепт. Поставката е чиста во минималистички дух, транспарентна и едноставно читлива. Во овој проект експериментирам и се изразувам преку фотографијата како медиум (движење, замрзнати кадри, мултипликација, дисторзија, текстови и бројки… која (фотографијата) најчесто станува критичар на општеството, на некој начин претставувајќи го секојдневниот живот на човекот, ја критикува реалноста или се потсмева, „сугерира или дедуцира“… дури и со прикажување на празна улица или напуштен дел од градот, разрушена зграда, излог, пејзаж…

Тишината која преовладува во меланхоличните урбани (улични) фотографии во кои се фокусирам на прекршени кадри, ја претставувам превртената реалност во која човекот како да има секундарна позиција. Контрапункт на оваа тишина во мрачно лирските естетски сетилни призвучја е видеото во кое е содржана целата хистерија и хаос на кои индивидуата е константно подложена. Брзината, звукот, светлината, дисторзијата, се ехо на сулудиот урбан ритам како неизбежна психолошка пресија, а помеѓу овие две, различни по динамика експресии, се наоѓа растегната човековата фигура во сета своја соголеност и кршливост.

Проектот, пред сé, е моја субјективна реакција, и рефлексија на она што ми (ни) се случува во ова проблематично и турбулентно време (и години наназад), време на конфликти од секаков тип, политички превирања и разлики – време на изместени вредности, бескрупулозност, континуиран страв и притисок од сите страни, хаос кој речиси секогаш е неповратен, време на кризи и војни кои влијаат на виталноста на целата планета.

Во тој контекст оваа изложба нема за цел да ги реши проблемите, туку да генерира прашања, проблеми на свеста и совеста, да ги истражи основните вредности на нашето постоење (онтолошкото во нас како битија), слободата, напредокот, цензурата, самоцензурата – преминувајќи во фрази кои се спротивставуваат на овие принципи и ја ставаат под ризик слободата на човештвото – објаснува Страхил Петровски во најавата за изложбата.

Роден во 1974 година во Куманово, Република Македонија, Страхил Петровски е претставник на средната генерација визуелни и мултимедијални уметници. Тој дипломира сликарство во 1997 година на Универзитетот „Св. Кирил и Методиј“ – Скопје, Факултет за ликовни уметности, во класата на ред. проф. Родољуб Анастасов, по што во 2000 година завршува постдипломски студии на истиот факултет кај истиот ментор.

Од 2000 до 2002 година работи како надворешен соработник демонстратор по предметот Сликарска технологија и сликарски техники, кај проф. Момчило Петровски и проф. Вело Ташовски, на Факултетот за ликовни уметности во Скопје, а од 2002 до 2010 година хонорарно е ангажиран во НУ Национален конзерваторски центар – Скопје, како надворешен соработник конзерватор во лабораторијата за конзервација и реставрација на икони.

Учествува и во реализацијата на првиот научноистражувачки проект „Брестал“, под менторство на проф. Момчило Петровски, на Факултетот за ликовни уметности – Скопје. Неговата уметничка практика опфаќа повеќе форми и медиуми на изразување, како што се: сликарство, инсталација, концептуална уметност, фотографија и видеоуметност.

Петровски, особено во последните години, користи теми поврзани со егзистенцијализмот и социополитички прашања како постконцептуален дискурс, но и длабоко естетски решенија како формалистички интерес. Голем број негови дела се наоѓаат во јавни и во приватни колекции, вклучувајќи музеи и галерии во земјава и во странство.

Член е на ДЛУМ од 1997 година, на ИКОМОС од 2001 до 2007 година и на ИКОМ од 2011 до денес. Работи како советник конзерватор – реставратор во НУ Национален конзерваторски центар – Скопје и како Доцент по предметите Фотографија и Мултимедија на Факултетот за арт и дизајн при Европски Универзитет, Скопје.

Проектот „Мементо мори“ е поддржан од Општина Куманово и НУ Музеј Куманово – Уметничка галерија, а во организација на Здружението за заштита и промоција на културата, културните вредности, визуелните уметности, архитектурата, дизајнот и културното наследство во РС Македонија, „Фабрика Концепт“.