Според последните податоци на Државниот завод за статистика, просечната месечна исплатена нето плата за вработен во август 2022 година изнесува 31.871 денар, што е за 3.229 денари повеќе од истиот месец минатата година.

Според државната статистика, зголемувањето на просечната месечна нето плата за 11,3 % во август годинава се должи, пред сè, на растот на платите во секторите: преработувачка индустрија (16,2 %), објекти за сместување и сервисни дејности со храна (16,1 %) и уметност, забава и рекреација (15,6 %).

Владата денеска во соопштение се пофали дека „континуираното зголемување на просечната нето плата е резултат на економските мерки и политики што ги спроведува Владата за раст на просечната и на минималната плата, која изнесува 18.000 денари“.

„И во следниот период Владата продолжува со креирање мерки и амбиент за повисоки стапки на економски раст и раст на приходите на сите граѓани, со цел да се унапреди животниот стандард на граѓаните особено во услови на криза“, се вели во владиното соопштение.